Willemstad- Riba invitashon di Minister (demisionario) pa Klima i Energia di Hulanda, Sr. Rob Jetten, Minister di Desaroyo Ekonómiko, Ruisandro Cijntje, a partisipá aktivamente na e diálogo di e lidernan mundial di energia riba nivel ministerial na okashon di e di 26 kongreso Mundial di Energia, e aña aki bou di e tema ‘Redesigning energy for People and Planet’.
Ku e di 26 kongreso aki, a konmemorá e di 100 aniversario di e ‘World Energy Council’ ku durante añanan nunka a desviá di e konsepto inisial di ta un organisashon imparsial, ophetivo i realístiko. Ku resultado, ku su análisisnan i programanan di akshon semper a promové energia duradero pa un i tur, netamente lokual minister Cijntje ta para pe.
E di 26 Kongreso Mundial di Energia a tuma lugá di 22 pa 25 aprel último na Rotterdam. Dia 23 i 24 di aprel, Minister Cijntje a partisipá riba invitashon eksklusivo na un resepshon di nivel haltu (High Level Reception) i na algun seshon bou di kua e Reunion Ministerial (Ministerial Meeting). E ophetivo di e Reunion Ministerial tabata dirigí riba interkambio ku 70 minister di otro pais riba implementashon di transishon di energia. Minister Cijntje a elaborá ampliamente riba e diferente akshonnan ku a bin ta tuma lugá den e proseso en kuestion aki na Kòrsou.
Ademas di esaki Minister Cijntje a partisipá na un resepshon durante kua e ta tin interkambio ku su kolega hulandes Sr. Rob Jetten i tambe Alkalde di Rotterdam, señor Ahmed Aboutaleb. Probechando di presensia di señor Boudewijn Siemons, kende na febrüari último a keda nombrá komo direktor general di Port of Rotterdam (PoR) a interkambiá di idea riba trahamentu huntu pa e parti portuario i logístiko pa ku desaroyo di Kòrsou den e transishon energétiko. For di yüli 2023 señor Siemons a fungi komo direktor general interino di PoR. Manera ya konosí Curaçao Ports Authority (CPA) tin un akuerdo di koperashon ku PoR pa interkambio di ekspertisio. PoR ta plenamente komprometé ku transishon energétiko ku e meta prinsipal pa realisá un haf limpi i deskarbonisá.
E partisipashon na e kongreso ta konsiderá komo di balor agregá teniendo kuenta ku einan ta reuní ku e lidernan, ekspertonan i interesadonan di diferente sektor i regionnan pa duna forma na e agènda energétiko mundial i asina promové e transishon energétiko limpi, hustu i prinsipalmente inklusivo.
Ruisandro Cijntje
Minister di desaroyo ekonómiko
