Willemstad- Minister Cijntje tabata na Madrid, e kapital di Spaña, dianan 25 i 26 di aprel 2024 pa liderá un mishon komersial for di Kòrsou i pa presensiá lansamentu di e asosashon empresarial “Agencia de Fomento Empresarial España – Curaçao”. Vários organisashon, representashon di gremionan i empresanan individual a partisipá na e mishon komersial aki.
E bishita di trabou a inisiá ku un bishita di kortesia serka Embahador di Reino na Spaña, señor Roel Nieuwenkamp. E Embahador huntu ku e Hefe di e Divishon di Ekonomia di e Embahada, señora Clara van Willigen, a interkambiá ku Minister Cijntje i su konseheronan tokante e desaroyonan na Kòrsou i kon por konektá Spaña ku Kòrsou riba diferente área. Pa e Embahador, tabata promé biaha ku e ta risibí informashon tokante desaroyo na Kòrsou i el a keda gratamente sorprendí pa e nivel di desaroyo i oportunidatnan ku Kòrsou tin pa ofresé. E Embahador a komprometé, pa yuda realisá e kontaktonan nesesario pa Kòrsou i pa e “Agencia de Fomento Empresarial España – Curaçao”.
E agensia aki ta un inisiativa partikular di algun empresario na Kòrsou i na Madrid pa krea un plataforma pa fasilitá mas negoshi ku Spaña. Despues di traha huntu pa 10 aña, opservando tur e potensialnan ku e merkado tin pa ofresé, Fausto Balentin i Robert Frans di Kòrsou i Diego Mayoral di Madrid a lanta un asosashon na novèmber 2023 pa krea asina un plataforma pa por stimulá i fasilitá negoshi entre Spaña i Kòrsou.
Dia 25 di aprel último, tabatin un sena ku algun invitado di sektor empresarial di Madrid, durante kua a interkambiá di un forma sosial i ameno tokante e potensial ku tin pa hasi negoshi entre Kòrsou i Spaña. Dia 26 di aprel, a tene un konferensia, ku porsierto tabata masha bon bishitá, kaminda vários organisashon manera CIFC, CINEX, CTB, CPA i Kámara di Komersio i tambe algun eksponente di Spaña a mustra tur e bentahanan pakiko skohe pa hasi negoshi ku Kòrsou.
Un di e temanan ku a bin dilanti tantu durante e sena komo durante e konferensia ta, ku tin un persepshon na Spaña ku Kòrsou ta un paraiso fiskal, i esaki ta impedí empresarionan spañó pa hasi negoshi ku Kòrsou. “Mester kita e persepshon ei mas lihé ku ta posibel, dor di hasi mas promoshon i duna mas informashon tokante Kòrsou su régimen fiskal, e kambionan ku pa años kaba a keda introdusí i ku empresarionan internashonal ku ta hasi negoshi na Kòrsou ta suheto na impuesto normal. Tambe, mester duna mas informashon tokante e insentivonan pa hasi invershon i realisá proyektonan na Kòrsou. Kòrsou ta un paraiso si, pero pa biba, bishitá i invertí”, Minister Cijntje a enfatisá.
Kòrsou por ta un destinashon turístiko interesante pa spañónan mirando ku nan gusta bai kaminda ta papia nan idioma. Ademas, Kòrsou por ta un hub interesante pa servisionan finansiero i fiskal. Tin hopi posibilidat pa koperashon ku Spaña riba tereno di agrikultura, peska, turismo krusero, energia renovabel i kultura.
Tambe a mustra riba e lokalidat stratégiko di Kòrsou na Sur di Karibe ku ta un punto ideal pa rutanan alternativo di transporte marítimo. Kòrsou ta tambe un bon sosio komersial pa empresanan spañó ku ke hasi negoshi ku Latino Amérika i vise vèrsa. “Ta esensial pa nos logra un buelo direkto for di Madrid. Tin rutanan alternativo via di Amsterdam, Bogotá i Miami, pero direkto semper ta mihó. E tim ta trahando kaba ku algun aerolínea pa atendé e detayenan”, Minister Cijntje a indiká. “Tambe ta esensial pa nos atraé un kadena di hotèl spañó pa establesé na Kòrsou. Kòrsou su playanan i tambe kultura sigur ta atraktivo pa e turista spañó”.
Kòrsou tin vários yu di tera ta traha i biba na diferente parti di Spaña. Nan ta nos diáspora, nos “embahadornan” pa identifiká e oportunidatnan ku ta presentá. Algun di nan tabata presente na e konferensia.
Tin diferente yu di Kòrsou ku ta aktivo na Spaña riba tereno di músika, IT, turismo i accounting. Kòrsou komo LGO tin akseso na fondonan Oropeo pa desaroyo i nos diásporapor hasi uso di esaki pa konektá programanan ku proyektonan na Kòrsou. Spaña tin vários isla ku tambe por bira partnernan importante den atkerí fondonan Oropeo.
Esaki ta e promé di vários aktividat ku a keda organisá na Madrid. Na yanüari 2025 un delegashon di Turismo lo partisipá na Fitur, un bolsa grandi di turismo na Madrid, Spaña.
Minister Cijntje i e delegashon empresarial ta wak bèk riba un bishita kòrtiku pero hopi fruktífero, kaminda por a identifiká un ruta konkreto pa habri e merkado spañó riba diferente tereno, manera logístika, IT, turismo, servisionan finansiero, agrikultura i kultura.
Ruisandro Cijntje
Minister di desaroyo ekonómiko
